,

   ပြည်တွင်းအခွန်များဦးစီးဌာနမှ အကောင်အထည်ဖော်ဆောင်ရွက်မည့် ခေတ်မီနည်းပညာအသုံးချ ဘက်စုံလွှမ်းခြုံသော အခွန်စီမံခန့်ခွဲမှုစနစ်- Integrated Tax Administration System (ITAS စနစ်) တွင်ပါဝင်သည့် လုပ်ဆောင်ချက်များ၊ ကြိုတင်ပြင်ဆင်ဆောင်ရွက်ထားရမည့်ကိစ္စရပ်များ နှင့်ပတ်သက်၍ အလုပ်ရုံဆွေးနွေးပွဲကို ၁၀-၁-၂၀၁၉ ရက်နေ့ နံနက် ၁၀:၀၀ နာရီတွင် ရန်ကုန်မြို့၊ ပြည်တွင်းအခွန်များဦးစီးဌာန၊ အခွန်ထမ်းကြီးများဆိုင်ရာအခွန်ရုံး၏ အစည်းအဝေးခန်းမ၌ ကျင်းပခဲ့ပါသည်။

    အဆိုပါ အလုပ်ရုံဆွေးနွေးပွဲကို ပြည်တွင်းအခွန်များဦးစီးဌာန၊ ဒုတိယညွှန်ကြားရေးမှူးချုပ် (အခွန်ဆိုင်ရာပြုပြင်ပြောင်းလဲရေး) ဒေါ်မြမြဦး၊ သတင်းအချက်အလက်နှင့်နည်းပညာဌာနခွဲ ညွှန်ကြားရေးမှူး၊ အခွန်ဆိုင်ရာပြုပြင်ပြောင်းလဲရေးဌာနခွဲ ညွှန်ကြားရေးမှူး အခွန်ထမ်းကြီးများဆိုင်ရာအခွန်ရုံး (LTO) ဌာနမှူး၊ အလယ်အလတ်အခွန်ထမ်းများဆိုင်ရာအခွန်ရုံး(၁)၊(၂)၊(၃) တို့မှ ဌာနမှူးများ၊ ဒုတိယညွှန်ကြားရေးမှူးများ၊ လက်ထောက်ညွှန်ကြားရေးမှူးများ၊ ဝန်ထမ်းများ နှင့် အကြံပေးပုဂ္ဂိုလ်များဖြစ်သော LTO Advisor Mrs. Anne Lohmann ၊ MTO-1 Advisor Mr. Mark Keeley နှင့် Mr. Tetsuya KUGE တို့ တက်ရောက်ခဲ့ကြပါသည်။

   အဆိုပါဆွေးနွေးပွဲတွင် ITAS စနစ်ကျွမ်းကျင်ပညာရှင် Mr. Andre Schoonbee မှ ITAS စနစ်တွင် ပါဝင်မည့် လုပ်ဆောင်ချက်များ၊ ကြိုတင်ပြင်ဆင်ဆောင်ရွက်ထားရမည့် ကိစ္စရပ်များကို တင်ပြဆွေးနွေးခဲ့ပြီး စနစ်အောင်မြင်ရေးအတွက် အားလုံးပူးပေါင်းပါဝင်ဆောင်ရွက်ရန် လိုအပ်ပါကြောင်း ရှင်းလင်းပြောကြားခဲ့ပါသည်။ ထို့နောက် တက်ရောက်လာသူများမှ သိရှိလိုသည်များကို အပြန်အလှန် မေးမြန်းဆွေးနွေး၍ အလုပ်ရုံဆွေးနွေးပွဲကို နေ့လည် ၁၂:၃၀ နာရီတွင် ရုတ်သိမ်းခဲ့ပါသည်။